Hebrews 9
'Ilixo sou Lalotu no Taasou Lalotu Ane no Lia 'o
1 aIoxe, aloxo Lataua ilo'a ta Isilaeli misakiinu opo vilesisi tei no anu 'ilixo sou ilotu ulai noxou, la Anu mulosi'a lapulotosou sou imulinu. Mo tani alelaxu noxou Lataua kalumo 'a muxolu no lia 'o. 2No nano no tani alelaxu noxou Lataua ne mutulusou aloxo 'o, no anu kaveutu ane i'una no anu tei ne la telu tanixu sou itulusou no anu xe valovalo sou veleti. Veleti e imulaxu no anu valovolo ne, anu Lataua na'u muisalili. Kaveutu ne ilemolu lexe, “Kaveutu Tavuna.” 3 bXe kaveutu ta tameisou e mukaveutunu mutulu no tumalou ane tei ne la mililixu lavalava sou muxixotonu. Kaveutu ane ta tameisou ne. Kaveutu ane ne ilemolu lexe, “Kaveutu Tavuna Manina.” 4 cNo nano no anu Kaveutu ane ne la valovalo sou i'elaxu mii tuma'u lailaixe sou ia'uxuxu ulai noxou Lataua mi'oxonu no anu xoulu a mutulu no nano. Mo kesi sou opo vilesisi noxou Lataua misu'asou pa'upa'umolu no anu xoulu. No nano no anu kesi ne la lisi xoulu vile mana muai no nano no anu xe Aloni vilaxoxu malusou muleme no anu xe lavo'o alelaxu sou lapuloto noxou Lataua ta tamei a muai no nano. 5 dXe no latanu kesi ne mipuine'i ta angelo ta tamei mitulu miialanu vivisi'a teitexi no tanixu sialu e inixi'u sou uxexeenu susu noxi'a ta mitema. Ta angelo ta tamei e mitulu miialanu vivisi'a musu'asou kesi anaxu ne misosovosou Lataua lexe Anu a muxolu no nano no anu kaveutu ne. Ia vaimomo 'o nenge tamomomo sou tasisimulinu mimii ukalusi uasi.6 eIoxe ilalaxiinu aloxo ne ukalu, la sou ta aili'i i'unalai no nano no anu kaveutu ane tavuna no ale sou i'oxonu xaixaii'a no voxovoxo ne. 7 fIa kisi'a ta aili'i anusisi alaxu vilevilesi no anu tauu ie vile u'unalai no nano no anu kaveutu ta tameisou e Tavuna Manina 'ole. No mine u'unalai ne, la u'unalai vitanisi uasi, anu uno'u sialu la u'unalailixu. Sialu ne anu ulai upeipeinu no nano ne sou uxexeenu susu noxou xe uxexeenu susu noxi'a ta mitema ane i'oxonu ia ilavusou uasi kalumo. 8No anu 'ilixo ane ne la Uleenu Tavuna mulosienge aloxo 'o. Vote'i sou ta'unalai no nano no anu Kaveutu Tavuna Manina no anu tani alelaxu noxou Lataua no lia 'o ne ulamana noxinge uasi. 9 gAnu tani ne anu loxo sosovo sou ulosienge sou mimii ane uxali no anu voxo vaimomo 'o no anu tani alelaxu sou lalotu noxou Lataua. Ane'i ino'u mimii ine'enu sou ilosou Lataua mo i'elaxu ulai noxou kalumo. Ia mimii latala ne umomomo sou u'isalilinoxu xavutalai'a uasi. 10La sou mimii e mi'oxo'oxonu ne anu loxo mii sou 'ani'anisi xe mii sou iiexusi xe mii sou 'ulo'ulosi. Lapuloto ane ne anu sou vasimengesi, ia Lataua mulosi'a lapuloto sou imulinu aloxo ne ulai uxali no anu voxo ane anu Lataua u'oxonu mimii uxali alavua.
Iesu Munixi'u Sialuxu
11Ia vaimomo 'o Kalisoto mune'e la muxolu loxo kisi'a ta aili'i sou mimii lailaixe ane muxali. Anu mu'unalai no nano no anu tani sou lalotu alelaxu tavuna noxou Lataua e lailaixe manina mua'ulixu tani sou lalotu alelaxu tavuna noxou Lataua ane tatei. Tani alelaxu tavuna noxou Lataua e Anu mune'e muxolu uxaxai no anu ne anu lailaixe manina, mua'ulixu ane ta mitema mitulusou no avo'a. Xo anu mii sou lialia 'o uasi. 12Mo no mine Anu mu'unalai no nano no anu Kaveutu Tavuna Manina no tani alelaxu sou lalotu noxou Lataua ne, la uno'u sialuxu xoutu mo bulumakau mulu uasi. No mine mu'unalai no nano no anu Kaveutu Tavuna Manina ne, la muno'u sialuxu mu'isalili ane mulai munixi'u ne. Anu mulai mu'oxonu aloxo ne lalalaaxu uasi, mu'oxonu alaxu vilesisi mo anesi. Anu mu'oxonu aloxo ne sou mulotonenge telivu sou tano'u mauli ane kaluxu uasi. 13 hIa no anu ane tei, lexe ta mitema ixali nuni'a no iou Lataua la ta aili'i ino'u sialuxu xoutu xe bulumakau mulu ilou lomuloxe bulumakau sema e mi'elaxe la ipeipeinu utelo noxi'a ta mitema sou i'ulosi'a no anu sou ixali malemalenga. No anu 'ilixo ane ne la sou ane'i ixali malemalenga no iou Lataua xe sosovo lexe Anu ta na'u muisalili. 14 iIa sialuxu Kalisito mua'ulixu ane ne, mo Anu susu vile uxolu noxou uasisi manina. Mo no anu xavinu Uleenu e mumauli utotomu kaluxu uasi, la Anu mu'italonu maulixu mulai noxou Lataua loxo mii sou u'ela ulai noxou. La sou no anu sialuxu ne la u'uinu vasimengesi uxali malemalengasi uasi. Anu uiasou susu noxinge la xavutalamenge uxali malemalenga no iou Lataua. La sou taxavutalanu lexe no anu 'ilixo sou tamulinu xaixai sou lapuloto tei e tano'u mauli no anu uasi ne tamulinu la uasi. La sou nenge tamomomo sou ta'oxonu xaixai noxou Lataua e mumauli utotomu mo kaluxu uasi. 15Tava'u xo Kalisito mu'oxonu aloxo ne, la sou Anu muxali loxo itema utulu nonixi sou u'oxonu pekia'u vote'i sou opo vilesisi ane alavua ne. Anu musoli ne sou mulotone'i no anu susu noxi'a no mine mixolu mimulimulinu 'ilixo sou ixalixu opo vilesisi tei ne. Aloxo ne la sou ta mitema ane milomusou 'ava noxou Lataua xe imulinu, la ino'u mauli ane kaluxu uasi e Lataua musakiinu vaikalasou tatei lexe ulosi'a ta 'olu muisalili ne.16Anu aloxo ne, la sou anu aloxo 'o, lexe itema vile usoli ia umasaxa lexe 'olu uno'u tanixu no anu miumiu la ukaukavunu lapepa vile loxo sou uxalixu opo vilesisi sou 'olu uno'u tanixu. Ia anu umomomo sou uno'u vitanisi uasi, lexe momu usoli la sou anu umomomo sou uno'u. 17Xo lexe itema ne umaumauli sio la mimii ne uaisi. Ia lexe anu usoli la sou nene'axu kaukavu no anu lapepa e musakiinu ne uxali manina. 18La sou anu iouvilesisi aloxo vote'i sou ixalixu opo vilesisi tei xe i'oxo pekia'usou la ino'u sialuxu bulumakau mulu xe xoutu sou ilai inixi'u. I'oxonu aloxo ne la uxalixu nene'axu vile laixe uasi. Xo i'oxonu xe ukalu la i'oxonu la. 19 jMo tei la Mosesi mu'oxonu aloxo, no mine mupelapela'a ta mitema mukalusi no anu lapuloto noxou Lataua sou imulinu mukalu, la muno'u sialuxu bulumakau mulu xe xoutu sialuxu la muxiunu ilou lexa. Xe mukalu la muno'u sipsip lauolauoinu laxusou la musakiinu muvaxa no anu ovu isopu avolu telexu. Xe mukalu la muvolivolinu no anu sialu ilou lexa la mumuainu mupeipeisou lavuku sou lapuloto xe mupeipeisi'a ta mitema kalumo. 20No mine mumuainu la muvikalane'i ta mitema aloxo 'o, “Sialu ane 'o ne anu mu'oxonu pekia'usou vaikala e Lataua musakiinu noxinge sou ngamulinu.” 21 kAnu mu'oxonu aloxo ne mukalu, la mu'oxonu iouvilesisi aloxo ne no tani alelaxu tavuna noxou Lataua, xe no anu mimii iouiou e muai no nano no tani tanu e ino'u sou ixaxaisou no anu lalotu no voxovoxo ne. 22 lAloxo ne, la sou anu aloxo 'o, no anu 'ilixo sou lapuloto, la sialusi anu umomomo sou u'uinu mimii latala uxali malemalenga. Mo lexe sialuxu mii vile unixi uasi, la umomomo sou Lataua uxexeenu susu noxi'a ta mitema uasi.
23 mMimii ane no anu tani alelaxu sou lalotu noxou Lataua no lia 'o ne anu tovola'i sou mii ma'ia ane uxoxolu teitexi no opo loxotolo ane. No lia 'o la sialuxa'a ta mimii u'uinu mimii uxali malemalenga no iou Lataua. Ia maninasou teitexi no opo loxotolo la 'ilixo sou mimii uxali malemalenga ne no anu sialu ane lailaixe manina. 24Nenge telavusou lexe Kalisito u'unalai no nano no anu Kaveutu Tavuna noxou Lataua ane ta mitema mitulusou no avo'a uasi. Tani alelaxu ne anu musosovosou tani alelaxu sou lalotu noxou Lataua manina sou ane Anu mu'unalai no anu ne. Anu mu'unalai no nano no opo loxotolo muisalili. Mo vaimomo 'o Anu a uxoxolu no pa'umolu Lataua sou usosovosinge no iou. 25Anu mu'unalai teitexi no opo loxotolo lalalaxu sou u'italonu maulixu noxou Lataua uasi. Loxo kisi'a ta aili'i u'oxo'oxonu utotomu no anu tauu ie vilevilesi. Anu uno'u sialuxa'a ta mimii la u'unalailixu no anu Kaveutu Tavuna Manina sou unixi'u ulai noxou Lataua. Sialu e anu ulai unixi'u ne anu na'u u'isalili uasi. 26 nLexe Anu u'oxonu lalalaxu, la Anu uno'u tu'umaxu alaxu tavu'alo manina. Usoko no mine Lataua musoko mukoinu mimii latala no lia 'o mukalusi mo une'e uxali vaimomo 'o. Ia uasi. Anu mupala'a mune'e la mu'italonu maulixu alaxu vilesisi manina. Xo voxo kalukaluxusou la sou Anu mu'unalai mu'italonu maulixu loxo mii sou i'elaxu ulai noxou Lataua. Anu mu'oxonu aloxo ne sou uxexeenu susu. 27Anu aloxo ta mitema ne isoli alaxu vilesisi, xe ili'i la ixali itulu no anu vaivaikala noxou Lataua. 28Anu aloxo Kalisito mu'italonu maulixu alaxu vilesisi sou muxexeenu susu noxi'a ta mitema latala mukalusi. Xe ili'i la anu une'e upala'alixu la. Ia no mine une'e la ne, la une'e sou utavulenu tu'utu'umaxu no anu susu la uasi. Anu une'esi sou uno'a ane'i ane mixolu mixoxomaiou sou ulivunoxa'a.
Copyright information for
ATA